Menu

የአዲስ አበባ ዩኒቨርስቲ ተማሪዎች ህብረት ምርጫ

ለሁሉም የአዲስ አበባ ዩኒቨርሲቲ የቅድመ ምረቃ መርሀ ግብር ተማሪዎች

የአዲስ አበባ ዩኒቨርሲቲ ተማሪዎች ህብረት ከህዳር 12 እስከ ታህሳስ 2011 ዓ/ም ድረስ በሁሉም ኮሌጆች ይካሄዳል፡፡ በተማሪዎች ዲን ጽ/ቤት በኩል በወጣው የጊዜ ሠሌዳ መሠረትም የክፍል፣ የባች፣ የዲፓርትመንትና የኮሌጅ ተወካዮች በመጨረሻም የህብረቱ ሥራ አስፈፃሚዎች ምርጫ ይካሄዳል፡፡ ምርጫው በሁሉም ኮሌጆች ገለልተኝነት፣ ታማኝነት፣ ግልፅነትና ፍትሃዊነት በተመላበት ዲሞክራሲያዊ መንገድ ይካሄዳል፡፡ በሁሉም ኮሌጅችና የትምህርት ተቋማት በሚገኙ ተማሪዎች የተወከሉ የቅድመ ምረቃ መርሀ ግብር ተማሪዎችን እንደዚሁም በተማሪዎች ዲን ጽ/ቤትና በኮሌጅ ዲኖችና ዳይሬክተሮች የተወከሉ ሠራተኞችን ያቀፈ አስመራጭ ኮሚቴም ተቋቁሟል፡፡ የምርጫውን ፍትሀዊነትና ዲሞክራሲያዊነት ለማስጠበቅ ሲባልም ግልፅና አሻሚነት የሌለው የመወዳደሪያ መስፈርት እንደዚሁም አስመራጭ ኮሚቴው ሊከተለው የሚገባ የማስመረጫ ጋይድ ላይን ተዘጋጅቶ በአዲስ አበባ ዩኒቨርሲቲ ድረ-ገፅና በሁሉም ኮሌጆችና ትምህርት ተቋማት በሚገኙ የማስታወቂያ ሠሌዳዎች እንዲለጠፉ ተደርጓል፡፡ በመሆኑም ይህ ታውቆ ሁሉም የአዲስ አበባ ዩኒቨርሲቲ የቅድመ ምረቃ መርሀ ግብር ተማሪዎች በህብረቱ የምርጫ ሂደት ላይ በመራጭነት፣ በተመራጭነትና በአስመራጭነት ንቁና ቀና ተሳትፎ በማድረግ የዩኒቨርሲቲያችንን ሠላማዊ የመማር-ማስተማር፣ የምርምርና የማህበረሰብ አገልግሎት ተልዕኮዎችን  ለማሳካት የሚያስችል ሚናችሁን እንድትጫወቱ በአክብሮት ጥሪያችንን እናስተላልፋለን፡፡

የምርጫ መስፈርቶች

  • በትምህርት ውጤቱ 2.75 እና ከዚያ በላይ ያለው /ያላት
  • በታማኝነት፤በቅንነት እና በመልካም አሳቢነት ተማሪውን ለማገልገል ፈቃደኛ የሆነ /የሆነች
  • ጥሩ የንግግር እና የማሳመን ችሎታ ያለው /ያላት
  • የተማሪውን ችግር ከሚመለከተው አካል ጋር በመነገገር መፍታት የሚችልጥሩ የመግባባት ችሎታ ያለው /ያላት
  • ምንም አይነት የዲሲፕሊን ቅጣት ተቀጥቶ የማያውቅ /የማታውቅ
  • ባለው አቅምና ጊዜ በበጎ ፈቃደኝነት ተማሪውን ማገልገል የሚችል /የምትችል
  • የተማሪዎች ህብረትን አላማዎች እና የተማሪውን  ነጻነትና ጥቅም የሚያስጠብቅ /የምታስጠብቅ

የተማሪዎች ዲን ጽ/ቤት