Menu

condolences

የዶ/ር ሰለሞን ደመና አጭር የህይወት ታሪክ

ዶ/ር ሰለሞን ደመና ወለሉ በአዲስ አበባ ከተማ ልዩ ስሙ ፒያሳ ጥቅምት 28፣1944 ዓ.ም. ተወለዱ ፡፡ ዕድሜያቸው ለትምህርት ሲደርስ የአንደኛና ሁለተኛ ደረጃ ትምህርታቸውን በ አዲስ አበባ አጠናቀው  የዩኒቨርስቲ መግቢያ ፈተና ከፍተኛ ውጤት በማስመዝገብ አዲስ አበባ ዩኒቨርሲቲ በመግባት ከ1963 እስከ 1972 ዓ.ም በህክምና ትምህርት አጠናቀው ተመርቀዋል፡፡

የህክምና ትምህርታቸውን ካጠናቀቁ በኃላ በቀድሞ ጎጃም ክፍለ ሃገር በፍኖተ ሰላም ከተማ በሚገኝ ሆስፒታል ሃኪም በመሆን ከ1973 ዓ.ም. እስከ 1975 ዓ.ም በታታሪነትና በቅንነት አገልግለዋል፡፡

ከ1976 አስከ 1979 ዓ.ም. በአዲስ አበባ ዩኒቨርሲቲ የህክምና ት/ቤት በውስጥ ደዌ ትምህርት ክፍል የድህረ ምረቃ ትምህርታቸውን አጠናቀዋል፡፡

የድህረ ምረቃ ትህምርታቸውን ካጠናቀቁ በኋላ በአዲስ አበባ ዩኒቨርሲቲ ህክምና ት/ቤት በረዳት ፐሮፌሰርነት ተቀጥረው በማስተማር በምርምርና በህክምና አገልግሎት በታማኝነት፣ በቅንነትና በታታሪነት እስከ 1980 ዓ.ም ሲያገለግሉ ከቆዩ በኋላ እንግሊዝ አገር በሚገኘው ዩኒቨርሲቲ ኦፍ ሎንደን ቅዱስ ቤርቶሌሞው ሆስፒታል ከ1980 እስከ 1981 ዓ.ም በኒውክሌር ሜድስን ማስተርስ ድግሪያቸውን አግኝተዋል፡፡

የኒውክሌር ሜድስን ክፍል መስራችና ኃላፊ በመሆን የህክምና አገልግሎትና የድህረ ምረቃ ፕሮግራም እንዲጀመር ከፍተኛ አስተዋፅኦ አድርገዋል፡፡

ዶ/ር ሰለሞን ደመና በተለያዩ የአገር ውስጥና የአገር ውጭ ጆርናሎች የምርምር ስራቸውን አሳትመዋል፡፡ ዩኒቨርሲtEውንና አገራቸው የጣሉባቸውን ኃላፊነት በጥሩ ስነምግባርና ውጤታማ በመሆን  አገልግለዋል፡፡ ከእነዚህ በጥቂቱ፤-

በኢትዮጵያ የኒውክሌር ሜድስን እድገት ከፍተኛ የሆነ አስተዋፅኦ በማድረግ ደከመኝ ሰለቸኝ ሳይሉ ደክመዋል፡፡ ከእነዚህም ውስጥ በቅርቡ ያዘጋጁት Introduction to Clinical Nuclear Medicine የሚል መፅሓፍ በህትመት ላይ ይገኛል፡፡

በአዲስ አበባ ዩኒቨርሲቲ ሕክምና ት/ቤት የውስጥ ደዌ ት/ት ክፍል ኃላፊ በመሆን 2001-2003 እ.አ አገልግለዋል፡፡

በአዲስ አበባ ዩኒቨርሲቲ ሕክምና ት/ቤት የውስጥ ደዌ ት/ት ክፍል ተባባሪ ፕሮፌሰር በመሆን አገልግለዋል፡፡

በዓለም አቀፍ አቶሚክ ኃይል ድርጅት የኢትዮጵያ ናሽናል ፕሮጀክት (Strengthening and Expanding Nuclear Medicine and Radiotherapy Services) አስተባባሪ ሆነው አገልግለዋል፡፡

በዓለም አቀፍ አቶሚክ ኃይል ድርጅት የአፍሪካ ክሊኒካል ኒውክሌር ሜድስን ፕሮጀክት አስተባባሪ ሆነው ሰርተዋል፡፡

ዶ/ር ሰለሞን ደመና ከባለቤታቸው ከወ/ሮ አስቴር አካሉ ጋር ለረዥም አመታት  በትዳር ቆይተዋል፡፡

ዶ/ር ሰለሞን ደመና እጅግ ሩህሩህ፣ ቅንና በስራቸውና በስነምግባራቸው በሁሉም ዘንድ ተወዳጅ ነበሩ፡፡

ዶ/ር ሰለሞን ደመና ባደረባቸው ድንገተኛ ህመም በ70 ዓመታቸው ህዳር 16፣2014 ዓ.ም ከዚህ ዓለም በሞት ተለይተዋል፡፡

ፈጣሪ ነፍሳቸውን በአፀደ ገነት ያኑር፡፡

ለቤተሰቦቻቸው ለስራ ባልደረቦቻቸው እና ለወዳጅ ዘመዶቻቸው መፅናናቱን እንመኛለን፡፡