Menu

Press Release on Selection of the Addis Ababa University President

     የአዲስ አበባ ዩኒቨርሲቲ ፕሬዝዳንት ምርጫ ሂደት ጋዜጣዊ መግለጫ

ጥር 14 ቀን 2010 ዓ.ም.

የአዲስ አበባ ዩኒቨርሲቲ አመራር ቦርድ ለዩኒቨርሲቲው ፕሬዝዳንትነት ተወዳድረው በውጤታቸው መሰረት በምልመላና ምርጫ ኮሚቴው ከቀረቡለት አምስት እጩዎች መካከል ሶስቱን በመምረጥ ለትምህርት ሚኒስቴር አቀረበ፡፡

የኢ.ፌ.ዴ.ሪ ትምህርት ሚኒስቴር ከሶስቱ አንዱን በመመምረጥ ፕሬዝዳንቱን ይሰይማል ተብሎ ይጠበቃል፡፡

በከፍተኛ ትምህርት አዋጅ ቁጥር 650/2001 ተመስርቶ የኢ.ፌ.ዴ.ሪ ትምህርት ሚኒስቴር የመንግስት ከፍተኛ ትምህርት ተቋማት የአመራሮችን እና የአስተዳዳሪዎችን ምርጫ፣ ሹመትና ምደባ ለመደንገግ ባወጣዉ መመሪያ ቀጥር 002/2009 እና የከፍተኛ ትምህርት  ተቋማት ከፍተኛ አመራር ዝግጅት፣ ምልመላና ስምሪት ማስተግበሪያ ማኑዋል ጥር 2009 መሰረት፣ የአዲስ አበባ ዩኒቨርሲቲ አመራር ቦርድ በዚህ አመት ጥቅምት መጨረሻ  የዩኒቨርሲቲውን ፕሬዝዳንት ለመምረጥ እንዲቻል ከቦርድ፣ ከመምህራን፣ ከተማሪዎች እና ከኢንዱስትሪው የተውጣጣ የምልመላ እና ምርጫ ኮሚቴ በማዋቀር ስራ እንዲጀመር አድርጓል፡፡ ኮሚቴውም መመሪያውን መሰረት ያደረጉ  እቅድና ዝርዝር መስፈርቶችን አዘጋጅቶ ለአዲስ አበባ ዩኒቨርሲቲ ፕሬዝዳንትነት መወዳደር የሚፈልጉ አመልካቾችን ለመጋበዝ  ኅዳር 16 ቀን 2010 ዓ.ም ማስታወቂያ በጋዜጣ አዉጥቶ ነበር፡፡

ማስታወቂያውን ተከትሎ 22 ኢትዮጵያውን እና የሌሎች ሀገራት ዜግነት ያላቸው ምሁራን ዩኒቨርሲቲውን ለመምራት ፍላጎት አሳይተዋል፡፡ ከእነዚህ መካከል በዉድድሩ የተለዩ 13ት አመልካቾች ስትራቴጅያዊ እቅዶቻቸውን ለኮሚቴዉ እንዲያስረዱ ተጋብዘው፤ 12ቱ በአካል ተገኝተዉ ለኮሚቴው እቅዶቻቸውን አቅርበዋል፡፡ ከእነዚህ መካከል ስምንቱ ለቃለ-መጠይቅ ፓናል አልፈዋል፡፡

ጥር 4 ቀን 2010 ዓ.ም. በአዲስ አበባ ዩኒቨርሲቲ የቢዝነስ እና ኢኮኖሚክስ ኮሌጅ ትልቁ አዳራሽ በተሰናዳው የቃለ-መጠይቅ ፓናል መርሀ-ግብር የዩኒቨርሲቲውን ማህበረሰብ የሚወክሉ ሁሉም የሴኔት አባላት፣ መምህራን፣ በየዩኒቨርሲተው ውስጥ ረዘም ያለ አገልግሎት ኖሯቸው አሁን በሌላ ስራ የተሰማሩ፣ የዩኒቨርሲው የውጭ ዜግነት ያላቸው መምህራን፣ የአስተዳደር ሰራተኞች፣ የቅድመ-ምረቃና ድህረ-ምረቃ ተማሪዎች፣ ሴቶች፣ ልዩ ፍላጎት ያላቸው ተማሪዎች በተወካዮቻቸዉ አማካኝነት ተሳታፊ ሆነዋል፤ የመረጣና ምልመላ ኮሚቴውም መርሀ-ግብሩን አስተባብሯል፡፡ ቀኑን ሙሉ የተከናወነው መርሀ-ግብር በስኬት ተጠናቋል፤ ለእያንዳንዱ ተወዳዳሪ የተሰጠው ነጥብም ወዲያውኑ  ይፋ ሆኗል፡፡ ይህ መርሀ-ግብር ከተከናወነ በኋላ ባሉት ቀናት ኮሚቴው ከስምንቱ እጩዎች መካከል በጠቅላላ ውጤት መዝኖ አምስት እጩዎችን ለቦርዱ ውሳኔ አቅርቧል፡፡

የአዲስ አበባ ዩኒቨርሲቲ አመራር ቦርድ ጥር 10 ቀን 2010 ዓ.ም. ባደረገው ስብሰባ ኮሚቴው ካቀረበለት አምስት እጩ ተወዳዳሪዎች መካከል ሶስቱን ለመጨረሻ ውሳኔ ለኢ.ፌ.ዴ.ሪ ትምህርት ሚኒስቴር አቅርቧል፡፡

እነዚህም በስማቸዉ የእንግሊዝኛ ፊደል ቅደም ተከተል መሰረት፡-

  1. ፕ/ር በቀለ ጉተማ ጀቤሳ
  2. ዶ/ር ጀይሉ ዑመር ሁሴን
  3. ፕ/ር ጣሰው ወልደሀና ካህሳይ ሆነዋል፡፡

ከሶስቱ እጩ ተወዳዳሪዎች መካከል የኢ.ፌ.ዴ.ሪ ትምህርት ሚኒስቴር አንዱን በመምረጥ ዩኒቨርሲቲውን እንዲመራ በቅርቡ ይሰይማል ተብሎ ይጠበቃል፡፡

የአዲስ አበባ ዩኒቨርሲቲ ሕዝብ ግንኙነት ጽህፈት ቤት ለሁሉም እጩ ተወዳዳሪዎች መልካም እድል ይመኛል፡፡

ጽህፈት ቤታችን ተጨማሪ መረጃዎችን እየተከታተለ መስጠቱን ይቀጥላል፡፡

የአዲስ አበባ ዩኒቨርሲቲ ሕዝብ ግንኙነት ጽህፈት ቤት

ጥር 14 ቀን 2010 ዓ.ም

አዲስ አበባ ዩኒቨርሲቲ

አዲስ አበባ